ಸರ್ಕಾರ ಸಂಕಷ್ಟದ ಪರಿಸ್ಥಿತಿಯಲ್ಲಿರುವಾಗ ಅದರ ಬೆನ್ನಿಗೆ ನಿಲ್ಲಬೇಕಾದ್ದು ಸರ್ಕಾರಿ ನೌಕರ ಕರ್ತವ್ಯ, ಸರ್ಕಾರಿ ನೌಕರರ   ತಿಂಗಳ ಸಂಬಳ ಕೊಡಲು ಸರ್ಕಾರದ ಹತ್ತಿರ ಆದಾಯ ಇಲ್ಲ. ಹೀಗಿರುವಾಗ . ಈ ಶೇ.30ರಷ್ಟು ಸಂಬಳ ಕಡಿತಕ್ಕೆ ರಾಜ್ಯ ಸರ್ಕಾರ ಮುಂದಾಗಿದೆ. ಆದ್ರೆ ಸರ್ಕಾರಿ ನೌಕರರು ಸಂಬಳ ಕಡಿತಕ್ಕೆ ಅಪಸ್ವರ ತೆಗೆದಿದ್ದಾರೆ. ನೌಕರರು  ಈ ರೀತಿಯ ವರ್ತನೆ ತೋರುತ್ತಿರುವುದು ಸಾಕಷ್ಟು ಟೀಕೆಗೆ ಕಾರಣವಾಗಿದೆ. ಕೇರಳದ ಸಿಎಂ ಪಿಣಾರಯಿ ವಿಜಯನ್ ಕೈಗೊಂಡಂತೆ ಯಡಿಯೂರಪ್ಪ ಕೂಡ ಯಾವುದೆ ಮುಲಾಜಿಲ್ಲದೇ ಸರ್ಕಾರಿ ನೌಕರರ ಸಂಬಳ ಕಡಿತದ ನಿರ್ಧಾರ ತೆಗೆದುಕೊಳ್ಳಲಿ ಎಂಬ ಸಲಹೆಗಳು ಕೇಳಿಬರುತ್ತಿವೆ.
ಕೊರೊನಾ ವೈರಸ್ ಸೋಂಕು ಹರಡದಂತೆ ದೇಶ ವ್ಯಾಪಿ ಲಾಕ್ ಡೌನ್ ನಡೆಸಿರುವುದರಿಂದ ಹಣಕಾಸು ವಿಷಯದಲ್ಲಿ ಸಂಕಷ್ಟಕ್ಕೆ ಸಿಲುಕಿವೆ. ಸರ್ಕಾರದ ಖಜಾನೆ ಹೆಚ್ಚೂ ಕಡಿಮೆ ಬರಿದಾಗಿದೆ. ಕರ್ನಾಟಕ ರಾಜ್ಯದ ಹಣಕಾಸು ಪರಿಸ್ಥಿತಿಯೂ ಬಿಗಡಾಯಿಸಿದೆ. ಕೇಂದ್ರ ಸರ್ಕಾರದಿಂದ ಬರಬೇಕಾದ ಜಿಎಸ್​ಟಿ ತೆರಿಗೆ ಪಾಲು ಬಂದಿಲ್ಲ. ಅಬಕಾರಿ ಆದಾಯವೇ ಈಗ ಸರ್ಕಾರಕ್ಕೆ ಜೀವಾಳ ಎನ್ನುವಂಥ ಸ್ಥಿತಿ ಇದೆ.
ಇದರ ನಡುವೆ ತಿಂಗಳು ತಿಂಗಳು ಸರ್ಕಾರಿ ನೌಕರರಿಗೆ ಸಂಬಳ ಹೊಂದಿಸುವುದೇ ದುಸ್ತರವಾಗಿದೆ. ರಾಜ್ಯ ಸರ್ಕಾರ ತನ್ನ ನೌಕರರಿಗೆ ತಿಂಗಳಿಗೆ ನೀಡುವ ಸಂಬಳದ ಮೊತ್ತವೇ ಬರೋಬ್ಬರಿ 6 ಸಾವಿರ ಕೋಟಿ ರೂಪಾಯಿ. ಇದೀಗ ಈ ಸಂಬಳದಲ್ಲಿ ಶೇ. 30ರಷ್ಟು ಕಡಿತ ಮಾಡುವ ಬಗ್ಗೆ ಸರ್ಕಾರದೊಳಗೆ ಚರ್ಚೆ ನಡೆಯುತ್ತಿದೆ.
ಸರ್ಕಾರಿ ನೌಕರರ ಸಂಬಳ ಕಡಿತ ಮಾಡುವ ಪ್ರಸ್ತಾವ ಈ ಮುಂಚೆಯೇ ರಾಜ್ಯ ಸರ್ಕಾರದ ಮುಂದಿತ್ತು. ಆದರೆ, ತುಟ್ಟಿಭತ್ಯೆ ಮತ್ತು ಇಎಲ್ ಲೀವ್ ಎನ್​ಕ್ಯಾಷ್ ಹಣವನ್ನು ಮಾತ್ರ ಫ್ರೀಜ್ ಮಾಡಲು ಮುಖ್ಯಮಂತ್ರಿ ಯಡಿಯೂರಪ್ಪ ನಿರ್ಧರಿಸಿದ್ದರು. ಅದೇ ವೇಳೆ, ಕೇರಳ ಸರ್ಕಾರ ತನ್ನ ನೌಕರರ ಶೇ. 30ರಷ್ಟು ಸಂಬಳ ಕಡಿತ ಮಾಡುವ ನಿರ್ಧಾರ ಬಹಳ ಬೇಗ ತೆಗೆದುಕೊಂಡಿತು. ಆದ್ರೆ ರಾಜ್ಯದಲ್ಲಿ ಮುಖ್ಯಮಂತ್ರಿ ಯಡಿಯೂರಪ್ಪ ಅವರು ನೌಕರರ ಸಂಬಳ ಕಟ್ ಮಾಡುವ ನಿರ್ಧಾರಕ್ಕೆ ಬಂದಿರಲಿಲ್ಲ.
ಈಗ ರಾಜ್ಯ ಸರ್ಕಾರಕ್ಕೆ ಹಣಕಾಸು ಪರಿಸ್ಥಿತಿ ತೀರಾ ವಿಷಮಿಸಿದೆ. ನೌಕರರಿಗೆ ಸಂಬಳ ಹಾಕುವುದರೊಳಗೆಯೇ ಸರ್ಕಾರದ ಖಜಾನೆ ಖಾಲಿಯಾಗುವಂಥ ಪರಿಸ್ಥಿತಿ ಇದೆ. ಸರ್ಕಾರದ ಎಲ್ಲಾ ಸ್ತರಗಳ ಅಧಿಕಾರಿಗಳು ಮತ್ತು ನೌಕರರ ಸಂಖ್ಯೆ 5.5 ಲಕ್ಷ ಇದೆ. ವಿಶ್ವವಿದ್ಯಾಲಯ ಮತ್ತು ಅನುದಾನಿತ ನೌಕರರನ್ನ ಒಳಗೊಂಡರೆ ಒಟ್ಟು ನೌಕರರ ಸಂಖ್ಯೆ 6.5 ಲಕ್ಷ ಆಗುತ್ತದೆ. ಇವರೆಲ್ಲರ ಸಂಬಳದ ಒಟ್ಟು ಮೊತ್ತ ವರ್ಷಕ್ಕೆ ಏನಿಲ್ಲವೆಂದರೂ 72-80 ಸಾವಿರಕೋಟಿ ಆಗುತ್ತದೆ ತುಟ್ಟಿಭತ್ಯೆ ಕಡಿತದಿಂದ ಸುಮಾರು 6,000 ಕೋಟಿಿ ಉಳಿತಾಯವಾಗುತ್ತದೆ. ಲೀವ್ ಎನ್​ಕ್ಯಾಷ್​ಮೆಂಟ್​ನಿಂದ 1,700 ಕೋಟಿ ಉಳಿತಾಯವಾಗುತ್ತದೆ. ಇವೆರಡರಿಂದ ಸರ್ಕಾರಕ್ಕೆ ವರ್ಷಕ್ಕೆ ಸುಮಾರು 7-8 ಸಾವಿರ ಕೋಟಿ ರೂಪಾಯಿ ಉಳಿತಾಯವಾಗಬಹುದು.
ಇನ್ನು, ಶೇ. 30ರಷ್ಟು ವೇತನ ಕಡಿತವಾದರೆ ಸರ್ಕಾರಕ್ಕೆ ಸುಮಾರು 21 ಸಾವಿರ ಕೋಟಿ ರೂಪಾಯಿ ಹೊರೆ ತಗ್ಗುತ್ತದೆ. ಸಂಬಳ ಕಡಿತ, ತುಟ್ಟಿಭತ್ಯೆ ರದ್ದು, ಲೀವ್ ಎನ್​ಕ್ಯಾಷ್ಮೆಂಟ್ ರದ್ದು ಈ ಮೂರು ಕ್ರಮಗಳಿಂದ ಸರ್ಕಾರಕ್ಕೆ ಸುಮಾರು 29-30 ಸಾವಿರ ಕೋಟಿ ರೂಪಾಯಿ ಹೊರೆ ತಗ್ಗುತ್ತದೆ. ಆ ಹಣವನ್ನ ಹಣಕಾಸು ಪುನಶ್ಚೇತನಕ್ಕೆ ಮತ್ತು ಕೋವಿಡ್ ವಿರುದ್ಧದ ಹೋರಾಟಕ್ಕೆ ಬಳಕೆ ಮಾಡಬಹುದು ಎಂಬ ಸಲಹೆ ಸರ್ಕಾರದ ವಲಯದಲ್ಲಿ ಹರಿದಾಡುತ್ತಿದೆ. ಆದರೆ, ಮುಖ್ಯಮಂತ್ರಿ ಯಡಿಯೂರಪ್ಪ ಅವರು ಮಾತ್ರ ಇದಕ್ಕೆ ಒಪ್ಪುತ್ತಿಲ್ಲ. ಸರ್ಕಾರಿ ಅಧಿಕಾರಿಗಳ ಲಾಬಿಗೆ ಅವರು ಮಣಿಯುತ್ತಿದ್ಧಾರೆಂಬ ಆರೋಪ ಕೇಳಿಬರುತ್ತಿದೆ.
ಸಂಬಳ ಕಡಿತ ಮಾಡುವ ಪ್ರಸ್ತಾವಕ್ಕೆ ಸರ್ಕಾರಿ ಅಧಿಕಾರಿಗಳು ಮತ್ತು ನೌಕರರು ಬಲವಾಗಿ ವಿರೋಧಿಸುತ್ತಾ ಬರುತ್ತಿದ್ದಾರೆ. ಕೊರೊನಾ ವಿರುದ್ಧದ ಹೋರಾಡಲು ಅಧಿಕಾರಿಗಳು ಮತ್ತು ನೌಕರರು ಒಂದು ದಿನದ ಸಂಬಳದ ಮೊತ್ತವಾದ 250 ಕೋಟಿ ರೂಪಾಯಿಯನ್ನು ಸರ್ಕಾರದ ಪರಿಹಾರ ನಿಧಿಗೆ ಕೊಡಲಾಗಿದೆ. ಅದಕ್ಕಿಂತ ಹೆಚ್ಚೇನು ಮಾಡಲು ಸಾಧ್ಯ ಎಂಬುದು ಸರ್ಕಾರಿ ಅಧಿಕಾರಿಗಳ ಪ್ರಶ್ನೆ.