ಗುಣಮಟ್ಟದ ಕಾಮಗಾರಿ ನೆಡೆಸುವಂತೆ ಶಾಸಕ ಅಮರೇಗೌಡ ಪಾಟೀಲ ಬಯ್ಯಾಪೂರ ಒತ್ತಾಯ.

ಕೊಪ್ಪಳ: ಜಿಲ್ಲೆಯ ಕುಷ್ಟಗಿ ಮತ್ತು ಯಲಬುರ್ಗಾ ತಾಲೂಕಿನಲ್ಲಿ ಕೃಷ್ಣ ಬಿ ಸ್ಕೀಂನ ಅಡಿಯಲ್ಲಿ ನೆಡೆಯುತ್ತಿರುವ ಕೆರೆ ತುಂಬಿಸುವ ಹಾಗೂ ಏತನೀರಾವರಿ ಯೋಜನೆಯು ಈ ಭಾಗದ ಜನತೆ ಹಾಗೂ ರೈತರಿಗೆ ಸೌಭಾಗ್ಯವಾಗಿದೆ.

ಭಗೀರಥ ತನ್ನ ತಪ್ಪಿಸಿನಿಂದ ಧರೆಗೆ ನೀರು ತಂದಂತೆ, ಒಣ ಭೂಮಿ ಪ್ರದೇಶವಾದ ಕುಷ್ಟಗಿ ಹಾಗೂ ಯಲಬುರ್ಗಾ ತಾಲೂಕಿಗೆ ಕೃಷ್ಣ ಬಿ ಸ್ಕೀಮ್ ಅಡಿಯಲ್ಲಿ ಏತ ನೀರಾವರಿ ಹಾಗೂ ಕೆರೆ ತುಂಬಿಸುವ ಯೋಜನೆಯನ್ನು ಸುಮಾರು 502 ಕೋಟಿ ವಿನಿಯೋಗಿಸುವ ಮುಖಾಂತರ ಕಾಮಗಾರಿಯನ್ನು ಜಾರಿಗೆ ತರಲಾಗಿದೆ.

ಆದರೆ ಗುತ್ತಿಗೆ ದಾರರು ಹಾಗೂ ಅಧಿಕಾರಿಗಳು ಈ ಒಂದು ಕಾಮಗಾರಿಯನ್ನು ಗುಣಮಟ್ಟದಿಂದ ನೆಡೆಸದೇ, ಮಣ್ಣು ಮಿಶ್ರಿತ ಮರಳನ್ನು ಬಳಸುವ ಮುಖಾಂತರ ಕಾಮಗಾರಿಯನ್ನು ಸಂಪೂರ್ಣವಾಗಿ ಕಳಪೆ ಮಟ್ಟದಲ್ಲಿ ನಿರ್ವಹಿಸಲಾಗುತ್ತಿದೆ ಎಂದು ಕಲಾಲಬಂಡಿ ಮತ್ತು ಕೃಷ್ಣಾ ಬೀ ಸ್ಕೀಂ ಯೋಜನೆ ಜಾಕವೇಲ್ ಹತ್ತಿರ ಇರುವ ಸುತ್ತ ಮುತ್ತಲಿನ ರೈತರು ಆರೋಪಿಸಿದ್ದಾರೆ.

ಹೌದು….. ಈ “ಕೃಷ್ಣಾ ಬಿ ಸ್ಕೀಂ” ಅಡಿಯಲ್ಲಿ ಕೊಪ್ಪಳ ಏತ ನೀರಾವರಿ ಯೋಜನೆ ಜಾರಿಗೆ ಆಗಬೇಕಾದರೆ ಸಾಕಷ್ಟು ಹಿರಿಯ ಜೀವಿಗಳು, ಸ್ವಾಮಿಜೀಯವರು ಹಾಗೂ ಕನ್ನಡ ಪರ ಸಂಘಟನೆಗಳು ಮತ್ತು ರೈತರು ಸೇರಿದಂತೆ ಹಲವು ಹೋರಾಟಗಾರರು ೫೦ ವರ್ಷಗಳ ಕಾಲ ಹೋರಾಟ ನೆಡೆಸಿದ್ದಾರೆ. ಅದರ ಫಲವಾಗಿ ಸರಕಾರ ಈ ಯೋಜನೆಯನ್ನು ಜಾರಿಗೊಳಿಸಿದೆ.

ಇಂದಿನ ಬಿಜೆಪಿ ಸರಕಾರದಲ್ಲಿ ಬೃಹತ್ ಕೈಗಾರಿಕಾ ಅಭಿವೃದ್ಧಿ ಸಚಿವರಾಗಿರುವ ಜಗದೀಶ್ ಶೆಟ್ಟರ್ ಅವರು ಈ ಹಿಂದೆ ಮುಖ್ಯಮಂತ್ರಿಯಾಗಿದ್ದರು ಹಾಗೂ ಈಗಿನ ಗೃಹಮಂತ್ರಿ ಬಸವರಾಜ್ ಬೊಮ್ಮಾಯಿ ಅವರು ಈ ಹಿಂದೆ ಜಲ ಸಂಪನ್ಮೂಲ ಸಚಿವರಾಗಿದ್ದ ಸಂದರ್ಭದಲ್ಲಿ ಜಾರಿಗೊಂಡ ಈ ಯೋಜನೆಯು ವಿವಿಧ ಮಠಾಧೀಶರ ಅಮೃತ ಹಸ್ತದಿಂದ 2013ರಲ್ಲಿ ಅಡಿಗಲ್ಲು ಹಾಕಿ ಚಾಲನೆ ನೀಡಿಲಾಗಿತ್ತು.

ಆಗ ಮೊದಲನೇಯ ಹಂತದ ಭಾಗವಾಗಿ ಸುಮಾರು 100 ಕೋಟಿ ಹಣ ನೀಡಿ‌ ಚಾಲನೆ ಕೊಡಲಾಗಿತ್ತು. ಆದರೆ ಇವತ್ತು ಈ ಒಂದು ಕಾಮಗಾರಿಯು ಆಮೆಗತಿಯಲ್ಲಿ ನಡೆಯುತ್ತಿರುವುದು ವಿಪರ್ಯಾಸ ಎಂದು ಹೇಳಬಹುದು.

ನಿಧಾನವಾಗಿ ನೆಡೆಯುತ್ತಿರುವ ಕಾಮಗಾರಿಗೆ “ಕೃಷ್ಣಾ ಭಾಗ್ಯ ಜಲ ನಿಗಮದ ಅಧಿಕಾರಿಗಳು ಮತ್ತು ಗುತ್ತಿಗೆದಾರರು ಮಣ್ಣು ಮಿಶ್ರಿತ ಮರಳನ್ನು ಬಳಸಿ ಅತ್ಯಂತ ಕಳಪೆ ಮಟ್ಟದಲ್ಲಿ ಕಾಮಗಾರಿಯನ್ನು ಮಾಡುತ್ತಿದ್ದಾರೆ. ಆ ಮುಖಾಂತರ ರೈತರ ಕನಸಿನ ಗೋಪುರ ಕೆಡವಿ, ಹೊಟ್ಟೆಗೆ ತಣ್ಣಿರಿನ ಬಟ್ಟೆ ಹಾಕುತ್ತಿದ್ದಾರೆ.

ಈ ಒಂದು ಕಳಪೆ ಕಾಮಗಾರಿಯ ಬಗ್ಗೆ ಸ್ಥಳಿಯ ಶಾಸಕ ಅಮರೇಗೌಡ ಬಯ್ಯಾಪೂರ್ ಅವರಿಗೆ ತಿಳಿಸಿದಾಗ, ಮಾಧ್ಯಮದವರ ಕರೆಗೆ ಓಗೊಟ್ಟು ದಿಢೀರನೆ ಸ್ಥಳಕ್ಕೆ ಆಗಮಿಸಿ, ಕಾಮಗಾರಿಯನ್ನು ವೀಕ್ಷಣೆ ಮಾಡಿ, ಗುತ್ತಿಗೆದಾರರನ್ನು ಹಾಗೂ ಆಧಿಕಾರಿಗಳನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ.

ಶಾಸಕರು ಮರಳನ್ನು ಪರಿಶೀಲನೆ ಮಾಡಿದಾಗ ಮಣ್ಣು ಮಿಶ್ರಿತ ಮರಳು ಕಂಡು ಅಧಿಕಾರಿಗಳ ಮೇಲೆ ಗರಂ ಆಗಿ, ಸ್ಥಳದಲ್ಲಿ ಇದ್ದ ಗುತ್ತಿಗೆದಾರನಿಗೆ ತರಾಟಗೆ ತೆಗೆದುಕೊಂಡು ಉತ್ತಮ ಗುಣಮಟ್ಟದ ಕಾಮಗಾರಿ ನೆಡೆಸುವಂತೆ ತಾಕೀತು ಮಾಡಿದರು.

ಈ ಸಂದರ್ಭದಲ್ಲಿ ಶಾಸಕ ಅಮರೇಗೌಡ ಪಾಟೀಲ ಬಯ್ಯಾಪೂರ ಮಾದ್ಯಮದವರಿಗೆ ಪ್ರತಿಕ್ರಿಯೆ ನೀಡಿ, ಈಗಾಗಲೇ ಸಂಸದರು ಜಿಲ್ಲೆಯ ಎಲ್ಲಾ ಶಾಸಕರು ಉನ್ನತ ಮಟ್ಟದ ಅಧಿಕಾರಿಗಳು ಸೇರಿ ಯಾವುದೇ ಕಾರಣಕ್ಕೂ ಕೊಪ್ಪಳ ಏತನೀರಾವರಿ ಮತ್ತು ಕೆರೆ ತುಂಬಿಸುವ ಯೋಜನೆಯ ಕಾಮಗಾರಿ ವಿಳಂಬ ಮಾಡಬಾರದು ಮತ್ತು ಕಾಮಗಾರಿ ಯಾವುದೇ ಕಾರಣಕ್ಕೂ ಕಳಪೆ ಆಗಬಾರದು ಎಂದು ಸಭೆಯಲ್ಲಿ ಹೇಳಲಾಗಿದೆ.

ಆದರೆ ಈ ಒಂದು ಕಾಮಗಾರಿಯು ಈ ಭಾಗದ ರೈತರ ಕನಸಿನ ಗೋಪುರವಾಗಿದ್ದು, ಯಾವುದೇ ಕಾರಣಕ್ಕೂ ರೈತರ ಕನಸಿಗೆ ತಣ್ಣೀರು ಎರಚಲು ನಾನು ಬಿಡುವುದಿಲ್ಲಾ, ಈ ಕಾಮಗಾರಿಯು ಮಣ್ಣು ಮಿಶ್ರಿತ ಮರಳುನ್ನು ಬಳಸುವ ಮುಖಾಂತರ ಕಳಪೆ ಮಟ್ಟದಲ್ಲಿ ನಡೆಯುತ್ತಿದೆ. ಇದನ್ನು ಮುಖ್ಯಮಂತ್ರಿಯವರ ಗಮನಕ್ಕೆ ತಂದು ಚರ್ಚೆ ಮಾಡಿ ಕಳಪೆ ಕಾಮಗಾರಿ ನಡೆಯದಂತೆ ನೋಡಿಕೊಳ್ಳುತ್ತೇನೆ.

ಇಷ್ಟಲ್ಲದೇ ಕೃಷ್ಣಾ ಭಾಗ್ಯ ಜಲ ನಿಗಮ ನಿಯಮಿತದ ಅಧಿಕಾರಿ ಹಾಗೂ ಗುತ್ತಿಗೆದಾರರಿಗೆ ಶಿಸ್ತು ಕ್ರಮಕೈಗೊಂಡು ಕಾಮಗಾರಿ ಉತ್ತಮ ರೀತಿಯಲ್ಲಿ ನಿರ್ವಹಣೆ ಯಾಗುವಂತೆ ಮಾಡುತ್ತೇನೆ ಎಂದರು.

ಈ ವಿಷಯವನ್ನು ನನ್ನ ಗಮನಕ್ಕೆ ಮಾದ್ಯಮದವರು ತಂದಿದ್ದು ಸಂತೋಷವಾಯಿತು. ಅಧಿಕಾರಿಗಳು ಮತ್ತು ಗುತ್ತಿಗೆದಾರರು ಯಾಕೆ ಈ ರೀತಿಯಾಗಿ ಮಾಡುತ್ತಿದ್ದಾರೆ ಗೊತ್ತಾಗುತ್ತಿಲ್ಲ, ಇವರಿಗೆ ಸಕಾಲಕ್ಕೆ ಸರ್ಕಾರ ಹಣ ಪಾವತಿ ಮಾಡುತ್ತಿದೆ. ಹೀಗಿದ್ದಾಗ್ಯೂ ಕಳಪೆ ಕಾಮಗಾರಿ ನೆಡೆಸುವದು ಎಷ್ಟರ ಮಟ್ಟಿಗೆ ಸರಿ..? ಇದು ರೈತರ ಕೆಂಗಣ್ಣಿಗೆ ಗುರಿಯಾಗುತ್ತದೆ ಇದನ್ನು ಪರಿಗಣಿಸಿ ಉತ್ತಮ ಗುಣಮಟ್ಟದ ಕಾಮಗಾರಿ ನೆಡೆಸುವಂತೆ ಸೂಚನೆ ನೀಡುತ್ತೇನೆ. ಇನ್ನೊಮ್ಮೆ ರೀತಿಯಾಗಿ ನೆಡೆದರೆ ನಾನೇ ಸ್ವತಃ ಸ್ಥಳದಲ್ಲೇ ಟೆಂಟ್ ಹಾಕಿ ಹೋರಾಟ ನೆಡೆಸಿ, ಗುತ್ತಿಗೆ ಪಡೆದ ಗುತ್ತಿಗೆದಾರರನ್ನು ಬದಲಾವಣೆ ಮಾಡುವಂತೆ ಸರಕಾರಕ್ಕೆ ಒತ್ತಡ ಹಾಕುತ್ತೇನೆ ಎಚ್ಚರಿಸಿದ್ದಾರೆ.

ವರದಿ: ನಾಗರಾಜ ಭೋವಿ