ಬಾಗೇಪಲ್ಲಿ: ಕರ್ನಾಟಕದಲ್ಲಿ ಗ್ರಾಮ ಪಂಚಾಯಿತಿ ಚುನಾವಣೆಯ ಹಿನ್ನೆಲೆಯಲ್ಲಿ ಬಹುತೇಕ ಗ್ರಾಮಗಳ ಅರಳಿ ಕಟ್ಟೆಗಳು ಪ್ರಸ್ತುತ ರಾಜಕೀಯ ಚರ್ಚಾ ವೇಧಿಕೆಗಳಾಗಿ ಮಾರ್ಪಟ್ಟಿವೆ.

ಈ ಗ್ರಾಮ ಪಂಚಾಯಿತಿ ಚುನಾವಣೆ ಬಹಳ ಕುತೂಹಲ ಕೇರಳಿಸಿದೆ. ಸುಮಾರು ವರ್ಷಗಳ ಕಾಲ ಗ್ರಾಮ ಪಂಚಾಯಿತಿ ಅಧ್ಯಕ್ಷ ಮತ್ತು ಸದಸ್ಯರಾಗಿ ಅಧಿಕಾರ ಹಿಡಿದಿದ್ದ ಮಾಜಿ ಅಧ್ಯಕ್ಷ ಮತ್ತು ಸದಸ್ಯರಿಗೆ ಈ ಬಾರಿ ಆತಂಕ ಸೃಷ್ಟಿಯಾಗಿದೆ. ಅಧಿಕಾರದ ಅವಧಿಯಲ್ಲಿ ನಡೆಸಿರುವ ಅಕ್ರಮ, ಭ್ರಷ್ಟಾಚಾರ, ಮೂಲಭೂತ ಸೌಲಭ್ಯಗಳನ್ನು ಕಲ್ಪಿಸುವಲ್ಲಿ ವಿಫಲವಾಗಿದ್ದು ಸೇರಿದಂತೆ ಹಲವಾರು ಲೋಪದೋಷಗಳಿಂದಾಗಿ ನುರಿತ ಗ್ರಾಮೀಣ ರಾಜಕಾರಣಿಗಳಿಗೂ ಕೆಲ ಪದವೀಧರ ಸ್ಪರ್ಧೆ ಬಿಸಿ ತುಪ್ಪವಾಗಿ ಪರಿಣಮಿಸಿದೆ.

ಬಾಗೇಪಲ್ಲಿ ತಾಲ್ಲೂಕಿನ ಪಾಳ್ಯಕೆರೆ ಗ್ರಾಮ ಪಂಚಾಯಿತಿಯ ವಿ. ಹರೀಶ್ ಎಂಬ ಯುವಕ ತನ್ನ ಪದವಿಯನ್ನು ಮುಗಿಸಿ ಗ್ರಾಮ ಪಂಚಾಯಿತಿ ಚುನಾವಣೆಗೆ ಸ್ಪರ್ಧೆ ಮಾಡಿದ್ದಾರೆ. ಹಾಗೂ ಗೂಳೂರು ಹೋಬಳಿ ಬಿಳ್ಳೂರು ಗ್ರಾಮ ಪಂಚಾಯಿತಿ ಪದವೀಧರ ಅನಿಲ್ ಕುಮಾರ್ ಚುನಾವಣೆಯಲ್ಲಿ ಸ್ಪರ್ಧೆ ಮಾಡಿದ್ದಾರೆ.

ಹಾಗೆಯೇ ಗೊರ್ತಪಲ್ಲಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ದೊಣಕೊಂಡ ಗ್ರಾಮದಲ್ಲಿ ನರೇಂದ್ರ ಎಂಬ ಪದವೀಧರ ಸ್ಪರ್ಧೆ ಮಾಡಿ ಉಳಿದ ಅಭ್ಯರ್ಥಿಗಳಿಗೆ ತಲೆನೋವಾಗಿ ಪರಿಣಮಿಸಿದ್ದಾರೆ. ಕೊತ್ತಕೋಟೆ ಗ್ರಾಮ ಪಂಚಾಯತಿ ವ್ಯಾಪ್ತಿಯ ಮಾಡಪಲ್ಲಿ ಕ್ಷೇತ್ರದಿಂದ ಶ್ರಾವಣಿ ಎಂಬ ಪದವೀಧರ ಮಹಿಳೆಯೂ ಚುನಾವಣಾ ಅಖಾಡದಲ್ಲಿದ್ದಾರೆ.

ಬದಲಾವಣೆ ಬಯಸಿ ತಾಲೂಕಿನಲ್ಲಿ ಹಲವು ಗ್ರಾಮ ಪಂಚಾಯಿತಿಗಳ ವ್ಯಾಪ್ತಿಯಲ್ಲಿ ಸುಮಾರು ವರ್ಷಗಳಿಂದ ಅಧಿಕಾರ ನಡೆಸಿಕೊಂಡು ಬಂದು ಜನರನ್ನು ಮರಳು ಮಾಡುತಿರುವ ಅಸಾಮಿಗಳನ್ನು ಸೋಲಿಸಲು ಜನರೇ ತೀರ್ಮಾನಿಸಿ ತಮ್ಮ ಪರವಾಗಿ ಪದವೀಧರರನ್ನು ಚುನಾವಣಾ ಕಣಕ್ಕೆ ಇಳಿಸಿದ್ದಾರೆ. ಇದರಿಂದಾಗಿ ಪ್ರಾಮಾಣಿಕ ಮತದಾರರು ತಮ್ಮ ಅಭ್ಯರ್ಥಿಯನ್ನು ಜಯಗೊಳಿಸಲು ಮುಂದಾಗಿದ್ದಾರೆ. ಇವರ ನಡುವೆ ಆಸೆ,ಆಮಿಷಗಳಿಗೆ ಬಲಿಯಾಗುವ ಮತದಾರರು ವಾಸ್ತವ ಅರಿತುಕೊಂಡು ತಮ್ಮ ಗ್ರಾಮಗಳ ಅಭಿವೃದ್ಧಿಗೆ ಈ ಚುನಾವಣೆಯ ಮೂಲಕ ಅಡಿಪಾಯ ಹಾಕಬೇಕಿದೆ ಎಂದು ದೇವಿಕುಂಟೆ ಗ್ರಾಮದ ಡಿ.ಜಿ.ಪವನ್ ಕಲ್ಯಾಣ ಅಭಿಪ್ರಾಯ ವ್ಯಕ್ತಪಡಿಸಿದರು.